Наш сайт продолжает публикацию Хронографа, сиречь Летописца Курляндско-литовского (Дегуцкого летописца). Текст приводится по списку, хранящемуся в Пушкинском Доме (Санкт-Петербург) и опубликованному в издании: Древлехранилище Пушкинского Дома: Материалы и исследования (СПб, 1990).
Соловецкая история
Лето 7180. 1672.
В сем году родился царевич Петр Алексеич, первый император.
Лето 7181. 1673.
Всюду вернии закалаеми,
Аки класове пожинаемы.
Лето 7182. 1674.
В сем году вместо воеводы Волохова от самодержца прислан к Соловецкому полковник Климент Иовлев с тысящею воинов, еже разорити святую киновию, человек лютый и немилостивый, иже пришед ко обители зельнейшую тесноту, горчайшую нужду, множайшия пакости святому месту сотвори, кони бо и волы монастырския, // келий служебныя окрест обители и рыболовныя сети и мрежи и неводы — вся сия неблагий он без остатка сожже, но мзду за сие от Бога немедленно прия: поражен бысть язвою согнития и червей воскипением, и в сих болезненно страдаше, и указом царским взяся к Москве, и тамо злый зле погибе в той язве и живота лишися. Под монастырем стояв два года.
Лето 7173-е. 1675.
Вместо онаго полковника царевым повелением прислан бысть Иоанн Мещеринов, лютейший мучитель, и с ним воинов тысяща триста, иже пришед под киновию со многими стеннобитными хитростьми, всяку кознь, всяко умышление // к разорению киновии чрез два лета показа.
В третие лето видев воевода, яко ничто же киновию ратующе успевает, и что действовати прочее недоумевается, но понеже случается домом великим от домашних разврататися, случается и исполином храбрым от приближенных умерщвлятися, случается градом крепким и необоримым от своих соплеменник предаватися — и зде о киновии тожде сострояется.
Лето 7184-е. 1676.
Мних некий во обители Феоктист именем нощию от обители чрез стену изшед, к ратным прииде и, якоже остави обещание свое и отеческую обитель, // оставляет и древлецерковное благочестие, лобызает Никоново новопредание, и не токмо себе и единой души своей неполезная и злая ходатайствует, но и Июдине злобе ревнует, предает обитель.
Изображение расправы воеводы Мещеринова с участниками Соловецкого восстания 1668—1676 гг. Начало XIX в. Художник М. В. Григорьев (?) Чернила, темпера. 69x102
Тогда Мещеринов святых отец различно мучив, к небесному животу отела всех иноков и бельцов числом до пяти сот. А егда воевода на взятие монастыря ко стенам приступаше, егда предатель времене подобно еже внутрь киновии ввести воинство смотряше, тогда на Москве государь царь телесною болезнию объемлется в самую неделю блуднаго <сына>, за седмицу до разорения киновии седмодневным неможением // томления, и зане болезнь крепце умножися, зане чаяние смерти прииде, о киновии прочее милосердствует, посылает к патриарху, просит благословения оставити киновию по отеческим законом жити.
Рекоша же, яко и чудотворцы Соловецкия явишася самодержцу, молиста ослабити обитель их.
Патриарх же всероссийский Иоаким
Крепчайший явися ко прошением сим,
Не толико пекийся о царстем здравии,
Елико о Соловецкия киновии взятии,
Не тако о немощи боляше,
Яко кинов разорен слышати хотяше,
Увеща онаго о милости не брещи,
Желая чудотворцев поты испроврещи.
Малым днем прешедшим, ельма скорби // царя зело участиша, паки посылает к патриарху, паки призвав молит и увещевает, еже простити соловецкия отцы, еже оставити в преданиих чудотворцев небоязненно жити.
Патриарх ожесточися паче камене,
Не смотряше царевы болезни пламене,
Увери царя милость ко отцем отложити,
Хотя место святое кровию облити.
Царь елико патриарху покаряшеся,
Толико лютейши болезнь умножашеся.
И толико болезни зелное терпяше —
Едва-едва и отдыхати можаше.
Виде тогда государь своего пастыря
Недавающа целительнаго пластыря,
Но здравию его содевающа спону,
От нея же утлачается путь к смертному гробу.
В четверток тоя седмицы ухвати самодержца болезнь зело крепка, // знамение дающи смерти, яко врачы-дохтуры и вся врачевския хитрости от себе отслати. В субботу же тоя седмицы посылает гонца наскоре к Соловецкой обители, разрешая гнев негодования, оставляя отцы жити в древлецерковнем предании, прошаше от них молитвы и благословения, ниже патриарха, ниже ины<х> от духовных вопросив, но своею властию, своим произволением восхоте милость излияти ко огорченным нуждником. Егда же государь милость показа к соловецким отцем, егда посла скорого бежца, веляша отступити воиньству от обители преподобных, тогда воевода стоящий под киновиею, чрез подведение предателя-киновию взя месяца // генваря в 29, в 1 час мясопустныя суботы; и вся жители, елико иноческаго и елико мирскаго чина острейшими мучения серпы, яко класы пожне и убиенных телесами и неповинною кровию святое окропи место.
Изображение расправы воеводы Мещеринова с участниками Соловецкого восстания. Фрагмент
И егда воевода толикая и таковая показа кроволияние, разорив чюдотворцев стяжания, егда кровавую ону соверши богонеугодную жертву, тогда в 8-й час того дне государь царь оставляет венец своего царствия, оставляет и власть миродержания и смертию от сего жития от слез умирает.
Изображение расправы воеводы Мещеринова с участниками Соловецкого восстания. Встреча гонцов в Вологде. Фрагмент
Воевода Мещеринов о смерти самодержца ничтоже ведый, посылает гонца к Москве, // радостне о взятии обители возвещая, и яко оба гонца на Вологде сретостася, ов прощение обители радостно ношаше, ов разорение тоя плачевно поведаше и к царствующему граду обратишася. Егда во град въехаша, странен вид узреста: сигклит царьский и прочия благородных одеждами облечены черными, безгласно являюще случай плачевный, смерть самодержца всем возвещают, рыдати своего государя вся понуждают.
По смерти самодержца сын его Феодор скипетр властодержания российскаго, яко наследие отца и деда удержав, услыша от неких Мещеринова в Соловецкой киновии грабяща // вещи церковный и казенныя, и повеле указом к Москве безчестно взяти, и тако оный мучитель, немилостивый распудитель, святыя киновии зверонравный и лютейший кровопиитель, ругательно и железо носящ к царьскому граду свезен. По мале от суда земнаго к небесному и неумытному восхищен, мучительных и кроволиятельных сеяний прегорчаяшия плоды пожинати.
|
